Էկոլուրը տեղեկացնում է, որ ՀՀ շրջակա միջավայրի նախարարի տեղակալ Վարդան Մելիքյանը սույն թվականի հոկտեմբերի 22-ին Երևանում կայացած «Գագաթաժողով հանուն անտառների. Գլոբալ ջանքերը և Հայաստանը» միջոցառման ժամանակ նշեց, որ 2020 թվականի հունվարից կսկսվի Հայաստանի անտառի ազգային 10-ամյա ծրագրի մշակումը: Ծրագրում պետք է ֆիքսվեն բոլոր այն խնդիրները, որոնք անհրաժեշտ է լուծել Հայաստանի անտառպատվածությունը մինչև 2050 թվականը 20. 1 %-ի հասցնելու համար:

Պրն. Մելիքյանը հավելեց, որ խոսքը գնում է ոչ միայն դասական անտառների մասին, այլև ագրոանտառաբուծության, դաշտապաշտպան անտառաշերտերի ստեղծման, ճանապարհների եզրերով ծառապատման մասին, այն գետերի, լճերի ափերին ծառատնկումների մասին, որտեղ նախկինում եղել են անտառներ, ծառեր:

Քննարկման ընթացքում ընդգծվեցին ապօրինի անտառահատումների դեմ տարվող աշխատանքները: ՀՀ բնապահպանության և ընդերքի տեսչական մարմնի կենսաբազմազանության վերահսկողության վարչության բուսական աշխարհի վերահսկողության բաժնի պետ Միքայել Սանթրոսյանը նշեց, որ առաջարկություն են ներկայացրել Աշխատանքային օրենսգրքում փոփոխություն մտցնել 24- ժամյա աշխատանք իրականացնելու համար: Սա տեսուչներին թույլ կտա շուրջօրյա հսկողություն իրականացնել:

www.ecostimule.com